728x90 شفرة ادسنس

الأربعاء، 11 سبتمبر، 2013

صفحة مانفيستو وكلام من كل الأدمنز لكل الزياديين الكرام





10 /أيلول / 2012 بلشت صفحة مانفيستو والكلام اليوم من كل الأدمنز لكل الزياديين الكرام.....
فتحنا الصفحة ومش ناويين نسكرها ورغم الحرب بسوريا مطرح مانحنا موجودين كان ومازال ملك الساحات هو فسحة الأمل الي خلتنا نمشي ونكفي الطريق ...
كان الهدف من الصفحة ننقل للناس عبقرية المعلم رشيد بدون تحريف وتشليف ...
كان الهدف نخبر الناس يلي مش كتير بيعرفوا زياد إنو سمعوا وشوفوا كيف تاريخنا عم تلعي نفسو ورح يستفرغ من كتر التكرار ....
كانت الغاية ناخد شوية قوة من زياد الموسيقي والفنان ونصرخ بوجه كيري وأوباما متل ماهو صرخ بزمانو بوجه كيسنجر " رب ربك مش مزحزحني من هون" ....
كان الهدف نقول لحالنا قبل مانقول لأي حدا تاني إنو بفضل موسيقتك وكلامك ياملك الساحات عبياض بعدنا طيبين قول الله والعقل زينة مابدنا ياه يكون طينة ونحنا مش تابعين لشي بس عم نتابع كلشي وبين كل نوتة موسيقية ومقطع مسرحي وغنية ومقال لزياد كنا عم نحس بإنوالفلم مكفي وشايفينو من دون شاشة ....
بهالفلم الأميركي الطويل الي كتب عنو زياد من زمان كتير ماتغير شي بالأميركان بس ياعمي البعض بتحسو شعب عنيد وعشي تيسنة ...زياد ماتغيرنا ونحنا متلو ماتغيرنا .....
اليوم بين ليلة وضواحيها لربما تقوم الحرب ونحنا متل إجرنا مش فارقة معنا ماهو الي نحنا فيه هلا حرب كمان بس عم يتخللها بعض الهدوء النسبي وبعجقة الحرب شوية موسيقى متل اَثار على الرمال قادرة تنتشلنا من عز الدمار ...
باختصار نحنا رفيقة و3 رفاق ...
مش كلنا بتوجه سياسي واحد بس سواء كنا ماركسيين أو لاء الي جمعنا إنو كلنا زياديين بامتياز ....
الفضل للي جامعنا ملك الساحات عبياض ومع معرفتنا الأكيدة إنو زياد مش كتير راضي عن صفحات الفيسبوك الي صايرة متل عياش بتكذب باسمو وأخبارو بس عم نجرب نكون مخنا مش معكوف وماننشر إلا كلشي نضيف .....
ينعاد على مانفيستو وكل الزياديين المجموعين ومش مقسومين ويضلو ينعاد علينا أجمعين تنفطس يارب ...
سألونا الناس لإيمت مكفيين مع زياد جاوبناهن صباح ومسا منمشي ومنكفي الطريق ودايماً زياديين يارفاق.

أدمنز صفحة مانفيستو 10 /أيلول / 2013

صفحة : زياد الرحباني ما العمل ؟Manifesto
  • تعليقات بلوجر
  • تعليقات الفيس بوك
Item Reviewed: صفحة مانفيستو وكلام من كل الأدمنز لكل الزياديين الكرام Rating: 5 Reviewed By: رحبانيات و فيروزيات
إلى الأعلى